ولا يحيطون بشئ من علمه
إن الحمد لله نحمده ونستعينه و نستهديه ونستغفره، ونعوذ بالله من شرور أنفسنا وسيئات أعمالنا، من يهده الله فلا مضل له، ومن يضلل فلن تجد له وليا مرشدا
رب اشرح لي صدري، و يسر لي أمري، و احلل عقدة من لساني، يفقهوا قولي
اللهم لا علم لنا الا ماعلمتنا.. اللهم انا نسألك علما نافعا و قلبا خاشعا.. و جسدا على البلاء صابرا
اللهم أجر الحق على ألسنتنا.. اللهم أيدنا بالحق و أيد الحق بنا..
اللهم اجعلنا من الذين يستمعون القول فيتبعون أحسنه
اللهم لك الحمد حمدا كثيرا طيبا أن هديتنا و ما كنا لنهتدي لولا أن هديتنا..
لماذا خلقنا..
السؤال الأزلي..
خلقنا.. لنعرف الله.. و نعبده حق عبادته.. هو ينفع أعبد الله و انا ما اعرفوش؟..
لازم اعرفه كويس جدا..
ناس كتير قلقانة و بتسأل… انا بالتزم.. و بارجع اعصى تاني.. و التزم و ارجع اعصى تاني.. أو مش قادر اني اواظب على الصلاة.. أو باصلي.. بس قلقان.. و مش سعيد.. و مكتئب. بالرغم من اني باذكر الله.. هو مش القلوب بتطمئن بذكر الله؟.. طب ليه أنا قلبي مابيطمئنش بذكر الله؟..
اقولك .. اقرا الاية كويس..
“الَّذِينَ آمَنُواْ وَتَطْمَئِنُّ قُلُوبُهُم بِذِكْرِ اللّهِ أَلاَ بِذِكْرِ اللّهِ تَطْمَئِنُّ الْقُلُوبُ (2 “ الرعد
مين اللي تطمئن قلوبهم بذكر الله؟.. الذين آمنوا..
آمنوا.. عرفوا الله حق معرفته..
قصدك يعني انى ما اعرفش ربنا؟.. ازاي يا عم مانا مسلم و موحد.. حتى اهه.. لااااا اله الا الله.. من قلبي والله..
يا سيدي ماحدش قال حاجة.. بارك الله فيك..و ثبتك..
و لكن مش دي المعرفة اللي الآية بتتكلم عليها..
المعرفة المقصودة هي انك تعرف الله و تحبه و تتعلق بيه وحده..
تحب اثبت لك انك ماتعرفوش كويس؟..
لو حد طلب منك تتكلم لمدة ساعة عن الله و عن أسماءه الحسنى و معانيها.. تقدر؟ غممزة
طيب هو اللي بيحب حد.. مش يعرف أحب أسمائه اليه؟..
شفت بقى؟.. ماهو لو فعلا تعرفه.. ماكنتش تقدر ماتحبوش.. ماكنتش تقدر ماتتعلقش بيه..
يوم ماتحبه.. ساعتها فعلا.. يطمئن قلبك لذكره.. لأنك بتفتكر انه دايما .. جنبك..
طيب يا سيدي عرفنا..
ازاي بقى.. ازاي أعرف ربنا.. ازاي اعرف الله؟..
بالعقيدة.. اني أعرف عقيدة .. اتعلم عقيدتي صح..
العقيدة أصل من أصول الإسلام.. أصل.. تخيل ان الفقه مثلا فرع؟.. يعني العقيدة أهم من الفقه.. ليه؟..
علم النفس الحديث.. بيقول ان شخصية الإنسان عبارة عن مجموعة عادات..
و ان العادات بتنشأ من أفكار الشخص و قناعاته.. يعني أفكارك و قناعاتك هي اللي بتتحكم في عاداتك و تصرفاتك.. يوم ماتكون القناعات و الأفكار دي صحيحة.. تصرفاتك تبقى صحيحة.. أوتوماتيك.. عشان كده العقيدة مهمة..
إذا صحت العقيدة.. صح العمل كله.. و إذا فسدت العقيدة.. فسد سائر العمل..
ازاي برضه؟..
مثلا..
فإذا اعتقدت مثلاً أن الله تعالى قبض قبضة وقال هذه إلى الجنة ولا أبالي وقبض قبضة وقال هــذه إلـى النار ولا أبالي والقضية انتهت ، هذه العقيدة تثبط همة المؤمن ..ً.
عشان كده.. هانبدأ مع بعض.. سلسلة لقاءات في العقيدة.. نتعلم سوا.. ازاي نعرف ربنا..
بداية.. عشان أعرف ربنا.. محتاج أعرف نفسي الأول.. فمن عرف نفسه.. عرف ربه..
ايه هي النفس؟
النفس هي ذات الإنسان ......
تعالى كده نتأمل الإنسان ده.. الإنسان ده كائن عجيب.. مخلوق من نوع خاص.. vip.. الكون كله بسمواته بأراضيه مسخر للإنسان..
يا ترى ايه أعز و أغلى عند الله.. الإنسان؟.. والا الكون بأجمعه؟..
الإنسان طبعا.. لأن ربنا سخر له كل الكون.. و طبعا المُسخر لَه أكرم من المُسَخَر
فيقول الله تعالى عن الإنسان:
“وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى كَثِيرٍ مِّمَّنْ خَلَقْنَا تَفْضِيلاً (70)” الإسراء
وأيضاً :
“ إِنَّا عَرَضْنَا الْأَمَانَةَ عَلَى السَّمَاوَاتِ وَالْأَرْضِ وَالْجِبَالِ فَأَبَيْنَ أَن يَحْمِلْنَهَا وَأَشْفَقْنَ مِنْهَا وَحَمَلَهَا الْإِنسَانُ إِنَّهُ كَانَ ظَلُوماً جَهُولاً (72)” الأحزاب
الإنسان اللي ربنا كرمه ده.. اداله وسائل للتكريم..
و منها “الإدراك”.. ربا كرمه بالإدراك..
الإنسان له قوة ادراكية.. الحيطة و المكتب و الأشجار.. دي مخلوقات لا تدرك.. فربنا فضل الإنسان على سائر المخلوقات بالإدراك..
مثلا.. القرد.. ايه الفرق بين الإنسان و القرد؟.. غير الديل طبعا :هع:
مجتمع القرود من يوم ماربنا خلقهم و هما قرود.. هل تطورت حياتهم؟.. تطور بمعنى ان بقى لهم مجتمعات و مؤسسات اجتماعية .. هل سكنوا في بيوت؟.. هل اخترعوا اجهزة؟…
القرد هو القرد من يوم ماربنا خلقه.. لأن فيه فرق بينه و بين الإنسان.. الإدراك..
الإدراك.. هو انسانية الإنسان.. من غير ادراك.. يوم مايتعطل الإدراك.. خلاص.. مابقاش انسان.. بقى زيه زي الحيوان بالظبط..
طيب هو الإدراك ممكن يتعطل فعلا؟.. ايوة..
الإدراك فيه مشكلة.. انه عالة.. مايقدرش يشتغل لوحده.. الإدراك عالة على المحيط الخارجي و المحيط الداخلي.. بمعنى ان الإدراك من غير محيط خارجي أو محيط داخلي.. مالوش لازمة.. خلاص وظيفته اتعطلت..
طيب ايه هو المحيط الخارجي و المحيط الداخلي و الكلام الكبير قوي ده ؟رغااي
المحيط الخارجي هو العالم من حواليك.. ربنا عمل للبني آدم شبابيك.. أو أبواب.. يطل منها على العالم من حواليه..
ايه هي الأبواب دي؟.. البصر.. و الشم و السمع و الذوق و الإحساس بالحرارة والبرودة وكمان الضغط وكل الأعصاب والحواس هي أبواب القوة الإدراكية على العالم الخارجي ،
و لو تخيلنا ان انسان ربنا اداله كل الذكاء اللي في الدنيا.. ذكاء البشر كلهم.. لكنه كان كفيف.. مابيشوفش.. يا ترى يقدر يعرف اللون الأحمر؟.. و ايه الفرق بينه و بين اللون الأخضر؟.. و يا ترى يعرف ايه الأجمل؟.. اللون الأزرق والا البنفسجي؟. طبعا لأ
تلاقي ان كلمات زي أحمـر - وأخضـر - وأزرق - وبنفسـجي ، وأبيـض وغيـره من الكلمات دي ،
مالهاش عنده أي معنى.. لأن الباب مقفول.. باب البصر مقفول.. و قوة إدراك الألوان محتاجة الباب ده يكون مفتوح..
و كذلك لو سألت واحد اصم مابيسمعش.. يا ترى صوت البلبل أجمل والا صوت الغراب؟.. يقدر يجاوب؟.. ابدا..
مهما كان متميزاً بالذكاء والنـوافذ المطلة على العالم الخارجي مغلقة فـالإدراك منعـدم .
عشان كده يقول الله تعالى :
“ وَمَثَلُ الَّذِينَ كَفَرُواْ كَمَثَلِ الَّذِي يَنْعِقُ بِمَا لاَ يَسْمَعُ إِلاَّ دُعَاء وَنِدَاء صُمٌّ بُكْمٌ عُمْيٌ فَهُمْ لاَ يَعْقِلُونَ (171)” البقرة
لا يعقلون.. لأن الإدراك محتاج سمع و بصر و نطق.. و لما يكون الواحد أصم و أبكم و أعمى.. فهو لا يعقل.. عشان كده دايما تلاقي الآيات تربط بين انعدام الحواس و انعدام العقل.. :nothere:
“ إِنَّ شَرَّ الدَّوَابِّ عِندَ اللّهِ الصُّمُّ الْبُكْمُ الَّذِينَ لاَ يَعْقِلُونَ (22) “ الأنفال
طيب.. عرفنا ان ربنا كرمنا بالإدراك.. و أنعم علينا بالأبواب اللي تخلي الإدراك ده يشتغل ..
طيب هل الأبواب دي أو الحواس دي مالهاش حدود؟..
يقول الله تعالى :
“ إِنَّا كُلَّ شَيْءٍ خَلَقْنَاهُ بِقَدَرٍ (49)” القمر
الحواس دي ربنا خلقها بقدر.. بحدود.. ازاي يعني؟..
دلوقت انت لما بتيجي تشرب كباية مية.. قبل ماتشربها.. بص فيها.. شايف ايه؟.. صافية و زي الفل اهو
طيب لو خدنا نقطة من نفس المية دي و حطيناها تحت الميكروسكوب.. بص عليها تاني.. شايف ايه؟ يا خبر .. آلاف و مئات الإلوف من الجراثيم والبكتريات والـعصيات ، انت لو مسكت كل كباية مية قبل ماتشربها و فحصتها تحت الميكروسكوب.. مش هاتشرب مية في حياتك خالص..
تستنتج ايه من ده؟.. ان قدرة الإبصار محدودة.. انت تقدر تشوف الأشياء على بعد 100 متر أو 200 متر على الأكتر.. و بعد كده ماتقدرش تشوف حاجة..
و دكتور العيون لما بتروحله بيقيس حدود القدرة دي.. بيحط لك اللوحة بينك و بينها حوالي 5 متر او اكتر فتشوف الفتحات اللي في الدوائر الكبيرة.. و كل ما صغرت الدوائر بقى أصعب عليك انك تشوف الفتحات. لغاية ما ماتقدرش تميزها خالص..
اذن قدرة البصر.. ليها حدود .. هل ده عيب؟.. هل ده نقص؟؟.. لا والله تخيل ان دي نعمة؟..
الرئيسية 
موضوع: ولا يحيطون بشئ من علمه 
الأحد يوليو 27, 2008 3:11 pm
